Pak Kasan karo Pak Soleh lagi asyik dopokan, ana sing uluk salam.
”Assalamu’alaikum, Kang apa nang ngumah…,” njangleng nangarep regol ngumah Pak Darno, tanggane Pak Kasan krungu ana tamu sing dong winginane dicritakna.
Kepengin melu ndopok wong wis madan suwe ora ketemu Pak Soleh. Pak Kasan njut semaur, “Eh Kang, ngeneh mlebu lah kiye piyayine wis nang kene, bukak bae grendele wong ora dikunci”.
Pada salam-salaman keton rumaket pisan, Pak Darno karo takon, “Priwe kabare keluarga moga-moga pada pinaringan berkah ya, jan keton bregas lan tambah nom”.
Semaure Pak Soleh, “Alhamdulillah Kang pendongane rika, ya pada waras, kur sing mbotot agi madan sumeng ketone keselen bar melu pawai tujuh belasan wingi”.
Bu Karti, bojone Pak Kasan mbareng krungu ana dayoh, njur metu karo madan gipyak, kemutan dong esih prawan madan naksir Pak Darno.
“Oh oh ana tamu ya,” Bu Karti karo menjep-menjep mesem.
Karo nyangking baki nggawa wedang. Bu Karti keton semringah bar weruh Pak Darno melu ngobrol.
Pak Darno semaur, ”Kesuwun Yu wedange”.
Karo nerusna takon karo Pak Kasan, “Kuwe lagi dopokan apa ketone koh serius pisan, jajal terusna”.
Pak Kasan mangsuli, “Iya kuwe Soleh kan nang Jakarta wis keton mapan, lan jere nang kana ya sering pada kumpul-kumpul karokanca batir sing wis pada manggon nang Jakarta”.
Pancen jenenge wong ngapak Banyumasan ketone kitgemien kuna seneng pada ngumpul silaturahmi, nduweni kangenan karo seni lan budayane, apa maning ngger masalah panganan khususe sroto karo mendoan lan gembus karemane.
“Bocah nom-noman siki pancen canggih-canggih goli pada dolanan jamane kemajuan digital. Ora kaya jamane inyong rika ya.”
Pak Soleh nerusna critane, karo nyruput kopi sing wis gari separo. “Oh kaya kuwe ya kue ya,” Pak Darno nyaut omongan.
“Pancen jaman siki beda karo awak ndewek ya, tapi ya kita termasuk yang beruntung, nemoni tiga jaman,” karo ngelus rambute sing wis kremun-kremun ana sing putih.
Mbaren krungu dopokane mau Bu Karti melu metu sakwise mbenerna dandanane men madan keton mlo-es, wong ana sing ditaksir gemiyen, karo ngucap :”Jan ndopoke ketone umyek temen,” karo nglirik Pa Darno.
Pancen jaman semana esih pada nom-nomane Bu Karti dong esih pada sekolah nang SMP bareng nate pacaran cinta monyet, wong Bu Karti keton madan ayu lan kewes.
Kemajuan desane Pak Karsan pancen diraksna wargane, wis akeh toko swalayan sing minggirna warung-warung-warga mungguh barang-barang sing didol.
baca juga: Nggrendengi Serulingmas
UMKM ya keton pada mulai akeh, sering dianakna bazar, wong punggawa desa ya keton aktif , kaya Bu Karti sing aktif nang erte dadi pengurus Posyandu.
Pak Soleh nutugna crita, ”Kang pancen nang kana pirang-pirang kumpulan utawa paguyuban sing anggotane nom-noman lan ana sing wis pada sepuh-sepuh ya esih keton giat”.
Pak Darno nyela dopokan :”Lah jere ana paguyuban Seruling Mas, sing jerene wis ngadeg 30 tahun, apa ya bener”.
Pak Kasan njut nyaut :”Ya kuwe mau wis dicritakna, dong rika urung teka” karo nyedot rokoke sing gari setugel.
Sambunge Pak Soleh, “Pancen Serulingmas wis 30 tahun ngadeg. Wis kaping enem goli ganti penguruse, jaman semana ya ngedab-edabi kiprahe khususe nggo daerahe, kaya sing tek omongna mau,” karo nyawang Pak Darno kambi Pak Kasan.
Nunggu tutuge.
Kang Dayun.
