Meh setengah jam lewih Pak Kasan, Pak Soleh karo Pak Darno tanek pisan ngobrole.
Bu Karti bojone Pak Kasan ngerti wedange wis meh pada entong, njur ngomong, “Kuwe goli pada kandhahan apa arep pada dijog wedange men lewih mbleketaket” karo nyekel teko wadah banyu panas mulai ngejog nang gelas.
Karo mbatin, apa kira-2 ne kiye nganti awan. Wong niate arep maring pasar nempur beras. Pak Soleh karo Pak Darno semaur bareng, “Kesuwun ya Yu ngrepotin kiye”.
Bu Karti semaur. “Lah wong ora ben ndina ikih goli pada tindak ngeneh, nyong sisan nyuwun pamit disit yah, arep meng pasar mbok kawanen”.
Jan-jane Bu Karti esih betah melu ngobrol, karo mingser meng njero.
Pak Kasan karo mingser nyandak rokok, takon maning, “Lah kuwe ana kumpulan-kumpulan pirang nang kana, apa ya akeh anggotane?”
“Ya anggotane macem-macem, kumpulane bocah nom-noman siki, sing paguyuban lawas wis pada pangsiun,” Pak Soleh mangsuli.
Pak Darno, nyambung takon. “Lah nek sing kae mau Serulingmas, sing jere gemien sing ngedegna para penggede kiprahe siki primen, Kang”.
”Pancen siki ya beda kondisine, apamaning bar ana pageblug Covid 19 meh 3 taun, kegiatan ya pada mandeg,
“Pancen sing jenenge pernyakit sing jere virus pancen nggegilani, wong kabeh pada kon nganggo masker karo ora ulih lunga mengendi-ngendi,“ Pak Soleh nerangena.
“Dong semane kumpulan pas HBH 2019 nang gedung pewayangan TMII arane, kuwe sing dadi panitiane, paguyuban Cilacapan Wijaya Kusuma.”
Karo ngunjal ambekan, Pak Darno nerusna, “Dadi bar kuwe wis ora bisa nganakna kegiatan”.
Pak Darno njur takon maning, karo Pak Soleh sing lagi ndeleng HP ne muni, “Kang dadi nang kana kuwe masalah kumpulan dadi nggo ajang paseduluran ya…”
Pak Kasan melu mangsulin, ”Jaman gemien kaya awake dewek dong esih sekolah beda karo siki”
Pak Darno lagi ngemut-emutna sing wis tau dicritani Tono keponakane dong bali ndesa, bab Serulingmas. Wong sok dadi panitia nang kegiatan paguyuban-paguyuban. Nerusna kesenengane dong esih dadi ketua Osis nang sekolahane.
Wong telu mau pancen kekancan wis kaya seduluran, mulane goli pada ngobrol gayeng, sok diimbuhi bab crita sing aneh2.
Pak Soleh ndeleng jam tangane, karo ngucap, “Wah ora krasa ngobrol nganti piran jam ya, soale ngko sorean arep balik ngulon.”
”Lah nembe teka winginane koh wis arep bali,” Pak Kasan negesna.
“Iya kiye bot-bote diparingi tugas kepanitiaan karo ketua Serulingmas kon nyiapna kumpulan,” semaure.
Pak Darno ya melu ngibuhi takon, ”Ya ngati-ati nang ndalan ya Kang, jere dalane wis alus,” sambunge.
”Apa kondure dewekan apa ana kancane”.
Pak Soleh semaur karo njanggleng, “Ya dewek, wong wingi diutus kon mampir Kabupaten ngaturaken laying.”
”Wis ya Kang aku pamitan arep tata-tata, ora krasa wis jam sewelas”
“Engko pamitaken mbekayune ya, assalamualaikum….
Metu ngregol terus bablas bali. Wong loro pada semaur bareng :”wassalamu’alaikum, ya ati-ati, angger ngantuk mandeg disit”.
(Untung RS)
