Pas dina Minggu Legi Pak Kasan nang ngumah, lagi liburan wong tanggale ya abang. Kesibukane dadi Ketua RT ya prei.
Njagong nang lincak pring wulung nyekel rokok karo nyanding kopi kenthel dikancani gorengan munthul karo gedang kepok. Santai banget. Jere arep kerawuhan piyayi sekang Jakarta, arep mampir ngumahe. Kebenaran Pak Soleh pinuju kondur nyekar leluhure sisan tilik ndesa Suka Hati sing jere wis ana kemajuane
“Bu”, uluke Pak Kasan kambi garwane sing mondar mandir meng dapur nggawa beceren sekang warung. “Kiye Bu, mengko kan Pak Soleh arep mampir nggone dewek jere kangen karo desane….winginane pas ketemu nang prapatan mbengine njut wa Nyong,” jawabe Pa Kasan karo bojone.
Srengenge ya wis trontong-trontong miwiti gagat awan. Karo ndeleng jam nang nduwur lemari pajangan, karo mbatin ngko nek Pak Soleh rawuh arep takon bab kanca-kanca sing pada nang kota kondisine priwe jere wis pada makmur. Miturut wertane sing sok di critakena nang WA karo pas telpun. Jere kanca batir pada sok ngumpul nggawe kumpulan peguyuban. Pirang-pirang jere.
Arane ya werna-werna, ana sing segrumbul desa, sekota lan liyane. Sing sok dicritakena anane Seruling Mas. Gemiyen jere sing ngedegna ya para penggede.
Eh, pas nglamun karo ngrungokna gendhing-gending Banyumasan, pas siaran radio Samhan sing penyiare Bu Sari, ana sing uluk salam, “Assalamu’alaikum.. “
Pak Kasan njut mangsuli, “wassalamu’alaikum…”.
Jemedul Pak Soleh wis nangarep lawang… njur pada salaman, karo rangkul-rangkulan..wong jenenge sobat lawas…mung beda nasibe.
“Mangga, pinarak Pak… jan rawuhe kapan ?” …pitakone Pak Kasan.
“Ya winginane …pas arep maghrib gutule, wong mangkate wis madan awan,” semaure Pak Darno kambi marani kursi, lungguh. Pak Kasan mbatin, wah ketone Pak Darno wis sukses nang Jakarta.
Ora let suwe Bu Kasan, bojone, mbareng krungu ana tamu njut metu,….karo nyalami lan takon, “Nggih sami sugeng Pak keng Ibu…manga pinarak …disekecaken goli dopokan….wong mpun radi dangu nggih,”.
Sembari mlebu….”kula tilar riyin nggih teng pedangan, arep nyiapna unjukan karo pacitan goring gedang.”
Pak Kasan karo bojone wis pada nyiapna pacitan nggo tamu kanca lawase.
Tamune miwiti pitakon, “Priwe kabare rika. Goli usaha tetanen karo ngingu wedus,”
“Alhamdulillah, ya kena nggo nyagak urip karo nyekolahna bocah,” semaure, karo nyedot rokoke.
“Pak jajal critane kepriwe bab anane kumpulan-kumpulan kanca batir goli pada nganakna silaturahmi,” pitakone Pak Kasan.
“Ya bener Kang jan nang kana sedulur akeh sing pada nduwe karep nglestarikaken seni karo budayane nggone dewek,” semaure Pak Soleh karo nyruput kopi sing disandingna Buk Karti.
“Pas taun kepungkur ya nganakna wayangan dalang Banyumasan mengeti ulang tahune Serulingmas kaping 30 tahun,” goli ngendikan Pa Soleh keton serius pisan.
“Miturut critane gemiyen dong jaman Orde Baru dewiwiti tahun 1992 nek ora salah, Serulingmas ngadeg. Sing ngadegna para penggede pirang-pirang ana 45 wong,” nerusna crita karo nyaut gorengan gedang kapok suguhane. “Nganti siki sing dadi Ketua Umum siki ya piyayi sekang Notog Purakerta,” Pak Soleh nutugna critane.
Pitakone Pak Kasan. “Lah, apa anggotane akeh apa priwe, apa ana kantore mbarang.”
“Anggotane ya ana Kang,” Pak Soleh nyaut. “Wong jamane semana sing dadi penguruse ya para penggede lan ya mumpuni sekabehane,” jawabe Pak Soleh.
Pak Soleh nutugna critane: “Seruling Mas ngadeg nang Pendapa Si Panji Purakerta Kabupaten Banyumas.” Karo ngunjal ambekan Pak Soleh nerusna maning, “Sing dadi penguruse sepisan Jendral Dading Kalbuadi, terus Jendral Soesilo Sudarman, banjur Laksamana Tanto Kuswanto, diterusna Pak Kuntoro Mangku Subroto sing Menteri, terus Pak Yuwono Kolopaking sudagar sing trah Kolopaking. Sing kaping nem Pak Wisnu Suhardono pengusaha nganti saiki.”
“Sing dikarepna para pendiri gemiyen,” Pak Soleh nerusna critane, “Seruling Mas bias dadi payunge kumpulan Banyumasan sing ana. Wong maksude yang nggo kukuban eks.Karesidenan Banyumas utawa Banyumas Raya, para perantau. Ning malah wis tekan ngendi-ngendi ora. Ana nang Solo, Jogja, Kediri, Pekalongan, Surabaya, Semarang, Medan, Bandung, Balikpapan, Lampung, Batam malah nganti Irian mbarang, nang Kairo ya ana,” Pak Soleh nambahi.
Pak Kasan ya takon maning, “Lah kuwe kerjane apa Seruling Mas tumrap nggone dewek, apa ya ana?”
Karo ngranggeh tissue nggo ngelap lambene sing kena lenga gorengan, pak Soleh mangsuli,” Tumrape daerahe dewek ya ana wong maksude ngadegna Seruling Mas kanthi rasa iklas lan tulus sing didasari rasa peduli karo keterpanggilan ya ana nganti siki. Kaya nang Purakerta Museum Pangsar Sudirman ana Museum BRI, nang Purbalingga kae desa wisata Karangbanjar nggon produk gelung rambut, nang Banjarnegara ya Taman Wisata Kewan Seruling Mas desa Selamanik la nang nang Tlacap kae Akper Seruling Mas siki malah wis dadi Stikes.
Karo mlongo Pak Kasan njur takon maning, “Lah sebanjure premen Kang. Lah nganti siki terus kepriwe Kang…….”_
Nunggu candhake……
(Sing Ndopok: Kang Dayun).
